កែប ៖​ ភ្លាមៗបន្ទាប់ពីចេញនូវសេចក្តីសម្រេចរបស់រាជរដ្ឋាភិបាលកម្ពុជាស្តីពីការបញ្ចប់ការហាមឃាត់ការធ្វើដំណើរនិងការបញ្ចប់ការបិទរមណីយដ្ឋានទេសចរណ៍នៅទូទាំងប្រទេសកម្ពុជា នៅព្រឹកថ្ងៃទី២៥ ខែមេសា ឆ្នាំ២០២១នេះ អភិបាលខេត្តកែប លោក សោម ពិសិដ្ឋ  បានផ្ញើសារជាសម្លេងដល់គណៈបញ្ជាការឯកភាព ស្នងការនរគបាល និងកងរាជអាវុធហត្ថខេត្តកែប ព្រមទាំងមន្ទីពាក់ព័ន្ធ ណែនាំឱ្យអនុញ្ញាតការធ្វើចរាចណ៍ជាធម្មតារវាងខេត្តមួយទៅខេត្តមួយ លើកលែងតែរាជធានីភ្នំពេញ និងខេត្តកណ្តាល។

លោក សោម ពិសិដ្ឋ បានប្រាប់ទៅអាជ្ញាគ្រប់ជាន់ថ្នាក់របស់ខេត្តកែបណែនាំទៅប្រជាពលរដ្ឋនិងសាធារណៈជនបានឆ្លងកាត់ខេត្តធម្មតា ប៉ុន្តែត្រូវរិតបន្តឹងវិធានសុខាភិបាលឱ្យបានម៉ឹងម៉ាត់ជាបន្តទៀត ពិសេសអនុសាសន៍របស់សម្តេចតេជោនាយករដ្ឋមន្ត្រី គឺ៣កុំ និង៣ការពារ ពោលគឺពាក់ម៉ាស់ វាស់កំដៅ លាងដៃនឹងអាកុលឬជែលជាដើម ហើយកុំមានការជួបជុំ កុំចាប់ដៃ និងកុំទៅកន្លែងបិទជិតជាដើម។

អភិបាលខេត្តកែបបានបន្តទៀតថា ត្រូវរិតបន្តឹងការកំណត់អត្តសញ្ញាណ ចំនួនរថយន្ត ម៉ូតូ ឬការចល័តរបស់ប្រជាពលរដ្ឋនៅក្នុងខេត្តកែប ពោលគឺត្រូវអនុវត្តសេចក្តីសម្រេចរបស់រាជរដ្ឋាភិបាលឱ្យមានប្រសិទ្ធភាព។

លោក សោម ពិសិដ្ឋ ក៏បានណែនាំឱ្យរក្សាប៉ុស្តិត្រួតពិនិត្យតាមគោលដៅនិមួយៗឱ្យនៅដដែរ៕